Zaria Txiki, Zariatxo eta Zariagaz
- Gabon Abesti Sariketa Probintzialaren baitan
estreinakoz egingo den Horra, Horra! kontzertu-ekitaldian ariko dira
Ereintza Elkarteak eta Gipuzkoako Abesbatzen Federazioak antolatutako ekitaldiaren baitako belaunaldi arteko emanaldi hori abenduaren 28an izango da, eguerdiko 12:30etan, Errenteriako Udal Kiroldegian.
Zaria Koru Eskolan entsegu irekiak izango dira abenduaren 26an eta 27an kontzertuan ariko diren LHko haurrek errepertorioa aurrez prestatu eta, bide batez, ahotsaren prestaketa zertan datzan ezagutzeko aukera izan dezaten.
Abenduaren 28an, Errenteriako Udal Kiroldegian izango da 73. Gabon Abesti Sariketa Probintziala. Ereintza Elkarteak eta Gipuzkoako Abesbatzen Federazioak antolatutako lehiaketa horren atariko gisa, aurten lehenbiziko aldiz Horra, Horra! belaunaldiarteko kontzertu-ekitaldia izango da goizean, Kiroldegian bertan.
Kontzertu horretan haurrak eta helduak elkarrekin ariko dira kantuan: haurrei dagokionez, Imanol Elizasuren zuzendaritzapean, gure Zaria Txiki, Zariatxo eta Zariagaz abesbatzek eta Oiartzungo Elizalde Ikastetxeko Abesbatza ariko dira gidari; horietako partaideekin batera kantuan ariko dira Errenteriako Bizarain Ikastola, Cristobal Gamon Herri Ikastetxea, Egiluze-Hijas de la Cruz, Koldo Mitxelena Herri Ikastetxeko eta Orereta Ikastolako LHko ikasleak. Helduei dagokienez, Donostiako Aita Donostia Abesbatza eta Pasaiako Ibaiertz Abesbatza eta Illumbe Abesbatza izango dira kantari. Halaber, Sergio Zapirain zuzendari duen Errenteria Musikal Orkestra izango dute lagun. Emanaldia Intujai Teatro taldearen umorezko saioek osotuko dute.
Kontzerturako sarrerak 3 €ko prezioan (12 urtetik gorakoentzat) erosi ahalko dira Kiroldegian bertan.
Haurrentzako entsegu irekiak Eskolan
Horra, horra! ekitaldiaren helburuetako bat abesbatza kantuaren inguruko ezagutzarik ez duten haurrek kantu mota horretara hurbiltzea den heinean, Zaria Koru Eskolak bi entsegu ireki antolatu ditu haurrek kantuaren oinarrizko teknika zertan datzan ezagutu eta horren inguruan sortzen diren hartu-emanak partekatzeko aukera izan dezaten. Kontzertuko egitaraua ardatz izango duten entsegu horiek Zaria Koru Eskolan bertan izango dira (Segundo Izpizua 3, Errenteria), abenduaren 26 ostegunean, 18:30etatik 19:30etara, eta 27 ostiralean, 11:00etatik 12:00etara. Entseguak kontzertuan aritzeko izena eman duen LHko haur ororentzat daude irekita.
